Монгол Ардын Намын дэргэдэх Социал Демократ Ахмадын Холбоо нийслэлийн МАН-ын ахмад гишүүд, дэмжигчдийг оролцуулсан ээлжит 10 дахь удаагийн уулзалтаа Тусгаар тогтнолын ордонд 2025 оны 4-р сарын .22-нд зохион байгуулав.

• 2025-04-24
• Н.Анхбаяр
• 57

Монгол Ардын Намын дэргэдэх Социал Демократ Ахмадын Холбоо нийслэлийн МАН-ын ахмад гишүүд, дэмжигчдийг оролцуулсан ээлжит 10 дахь удаагийн уулзалтаа Тусгаар тогтнолын ордонд 2025 оны 4-р сарын .22-нд зохион байгуулав.
МАН-ын дэргэдэх Социал Демократ Ахмадын холбооноос зохион явуулдаг ээжит Х дахь уулзалтад УИХ-ын гишүүн, Гадаад харилцааны сайд Б.Батцэцэг оролцож “Олон улсын нөхцөл байдал, Монгол Улсын гадаад бодлого”, УИХ-ын гишүүн, Аюулгүй байдал, гадаад бодлогын байнгын хорооны дарга Г.Тэмүүлэн “Үндэсний аюулгүй байдалд тулгамдаж буй сорилт бэрхшээл” сэдвээр илтгэл тавьж МАН-ын ахмад гишүүдийн сонирхсон асуултад хариулт өглөө.Уулзалтад 400 гаруй Социал Демократ Ахмадын холбооны гишүүд оролцож 16 ахмадууд асуулт асууж уулзалт гурван цаг гаруй үргэлжиллээ.

УИХ-ын гишүүн, Гадаад харилцааны сайд Б.Батцэцэг : Олон улсын харилцаа, геополитикийн нөхцөл байдал, Монгол Улсын гадаад бодлогын зарчим, зорилтууд, энэ хүрээнд хэрэгжүүлж буй үйл ажиллагаа болон гадаад бодлого, харилцааны нэгдмэл байдлын ач холбогдлын талаар дэлгэрэнгүй танилцуулаа.
Манай улсын гадаад бодлого сүүлийн жилүүдэд идэвхтэй хөгжиж байгааг УИХ-ын гишүүн, Гадаад харилцааны сайд Б.Батцэцэг онцлохын зэрэгцээ олон улсын харилцааны нөхцөл байдал тогтворгүй, таамаглахын аргагүй өөрчлөгдөж, цаашид хэрхэх нь тодорхой бус шинэ сорилттой тулгарч байгааг мэдэрч манай улс ухаалаг, уян хатан бодлого идэвхтэй явуулах учиртайг сайд чухалчилан тэмдэглэлээ.
Мөн тэрээр хэлэхдээ : -Манай улс аюулгүй байдал, гадаад харилцааны асуудалд нэг бодлого, нэгдмэл байр суурьтай нэг цонхны зарчим баримталж байгааг ч дурдлаа. Үүний зэрэгцээ дэлхийн олон оронд ажиллаж, амьдарч, суралцаж буй монголчуудынхаа эрх ашгийг хамгаалах талаар “Зөгийн үүр”, “Дэлхийн монголчууд-2” зэрэг төсөл хөтөлбөрүүд хэрэгжиж байна.
-Олон улс, бүс нутагт өрнөж буй үйл явдлууд Монголчуудаас уян хатан ухаалаг, зарчимч идэвхтэй гадаад бодлого хэрэгжүүлэхийг шаардаж байна. Энэ ч утгаараа Монгол улс НҮБ-ын гишүүн 192 оронтой дипломат харилцаа тогтоож, нээлттэй, олон тулгуурт гадаад бодлогыг амжилттай хэрэгжүүлж байна.
-Сүүлийн хоёр жилд Монгол улс төрийн өндөр дээд хэмжээний айлчлалуудыг харилцан хэрэгжүүлж байгаа нь Гадаад харилцааны бодлого зөв урагшилж байгааг илэрхийлж байна. Тухайлбал сүүлийн 2 жилд Монгол улсад 13 улсын төрийн тэргүүн, 8 улсын парламентын дарга, 1 улсын ерөнхий сайд, 17 улсын Гадаад харилцааны сайд айлчилжээ.

-Монгол улсын иргэд дэлхийн аль ч оронд зорчих боломжтой бөгөөд хоёр хөрштэйгөө ч бид тэнцвэртэй гадаад бодлогыг хэрэгжүүлж байна. Өнөөдөр Монгол улсын 250 мянган иргэн дэлхийн 90 гаруй оронд ажиллаж амьдардаг байна.
– Цаашдаа Гадаад харилцааны асуудалд нэг бодлого, нэгдмэл байр суурьтай байх ёстой төдийгүй энэ сэдвийг улс төржүүлэх нь үндэсний аюулгүй байдал, тусгаар тогтнол, хөгжил дэвшилд сөргөөр нөлөөлөх эрсдэлтэй учраас Монгол улс гэсэн ганцхан “малгайтай” энэ асуудалд хандах учиртайг Гадаад харилцааны сайд Б.Батцэцэг тодотголоо.

Уулзалтад оролцсон ахмадуудын төлөөлөл монгол хүний үнэлэмж гадаадад ямар байдаг талаар, Солонгост очсон залуусыг тэнд баривчилж байхаар эх оронд нь аятай амьдруулах бодлого хэрэгтэйг, Гадаад харилцааны чиглэлээр томилогдож буй боловсон хүчний сонголт, тэдний ёс зүйд анхаарах зэрэг асуудлыг түлхүү хөндөж байлаа. Дэлхий дахины улс төр, аюулгүй байдал, эдийн засгийн орчин тогтворгүй, ээдрээтэй энэ цаг үед улс үндэстнийхээ язгуур эрх ашгийг эрхэмлэн, уламжлал, үнэт зүйлээ хадгалсан, тэнцвэртэй гадаад бодлого явуулахын чухлыг ахмадууд маань онцолж, үнэт сургаалаа айлдсан юм.
МАН-ын ахмад гишүүд маань гадаад харилцааны салбарын хүний нөөцийн бодлого, дипломат албаны томилгооны талаар лавлан асууж, төрийн тусгай алба босго өндөр, мэргэжлийн, тогтвортой байх ёстойг хэлж, зарим асуудалд санаа зовниж буйгаа илэрхийлж байлаа.

Уулзалтыг зохион байгуулахад Социал Демократ Ахмадын Холбооны тэргүүн Б.Гомбо, тус холбооны ерөнхий нарийн бичгийн дарга Т.Гантөмөр, нарийн бичгийн дарга Г.Хандармаа, улс төрийн ахлах ажилтан Н. Анхбаяр, Нийслэлийн Социал Демократ Ахмадын холбооны дарга Энхтөр дэд дарга Балдангомбо нар оролцсон юм.